جعل خبة القـرو تسقيهـا هماليـل الرفايـا

قلب الاسد الأحد أغسطس 03, 2008 3:10 am

جعل خبة القـرو تسقيهـا هماليـل الرفايـا
لين تكسيها ذواليق الزهـر مثـل المرايـن

ذا النهار ابرك نهار وذا العشي ابرك عشايا
في منصة تركي بن سعود شاهدنـا المزايـن

جايزة سود البكار اللـي عواتقهـن عرايـا
البكار اللي يقلـط مـن نوادرهـن عوايـن

مكرمن أهل البكار السـود زينـات الحلايـا
بالمواتر غالية لاثمـان ضخمـات المكايـن

حطه الهيلع طويـل الشبـر داهيـة الدهايـا
الكبير ابن الكبير اللي علـى القمـة تبايـن

فـوق قمـة كنهـا قمـة جبـال الهمـلايـا
اتمنــــى ليـت تركـي حـي بعيونـه يعايـن

فالفعول اللـي راعيهـا يشومـن الصبايـا
ناقل الحمل الثقيل و مطلق رقـاب الرهايـن

لحية لا ما هقيـت بهـا تعيـن لـك تحايـا
التحايـــا مـن جـنـــاب للـنـــاس لايــــن

و لحية لا ما هقيت بها تضيع بهـا الهقايـا
من كرمها غسل إيدينـك و مسحهـا بفايـن

و انت يا عبدالعزيز المدح يمشي لك جرايـا
كل بحر من بحور الشعر يمشي لك سفايـن

يا حفيد أهل القصب و الجوخ و نحور السبايا
واهل العوجا و اهل الأجرب مفرقة الضعاين

بين بوك و بين بن عوّاد زيـزوم السرايـا
زاين حظك يا بو تركي و حظ الخـال زايـن

زايديٍ شايـع صيتـه مـع سبـع النحايـا
اشهد انه في سنام المرجلـه قالـط و مايـن

و انت سعد أهل الركاب اللي مزاهبهم خلايـا
أشهد انك مزبن للي عليـه الوقـت شايـن

المطر غيثٍ على خضر النوامـي و الرعايـا
وانت جوداتك تغيث قلوب و تعمـر مدايـن

و الله انك كامل الشارات فـي كـل المزايـا
استلمها عالبلاطه كـآش مـا فيهـا مدايـن